Solo Player

Geus lila pisan urang karak curhat deui euy, lain euweuh waktu, ngan asa hoream teu aya picaritaeun nu rame. Beda ayeuna mah teu kos baheula, di sosmed oge jarang posting. Unggal poe di imah wae, nyo'o hp atawa gigitaran, asa butek hirup teh. Sakapeung sok hayang ngabolang kokoloyongan, tapi ayeuna mah mikir dua kali keur meuli bensinna, mahal tuda, jadi nyaah mun dipake kokoloyongan doang, komo mun boga duit tibang pas-pasan.

Hampir unggal waktu di imah wae, sora radio butut ngaberekbek siaran Sonora FM, muter lagu-lagu taun 2000an wae jadi asa balik deui ka jaman urang keur ngora. Kopi hideung jeung udud mah sok aya sih, ngan beda ayeuna mah ududna nu murahan siga udud aki-aki, Sampoerna Kretek atawa Gudang Garem Beureum, sakapeung udud Raven nu teu panas teuing kanu letah. Bisa ngasaan udud ngonah teh mun aya nu mere, Sampoena A Mild ti si Jojo atawa Ganu sok mere sabungkus. Mun ngarah meuli sorangan mah asa nyaah euy, mahal pisan.

Garapan teh ayeuna mah lain garapan Hp, tapi ngagarap Faucet Crypto mulungan receh di internet, nempoan iklan. Hasilna mah palingan keur meuli kuota internet, nya kitu-kitu keneh weh. Pernah miluan jadi Affiliator di Sophee jeung Tokped, tapi hoream posting-posting produkna, padahal lumayan mun dileukeunan mah. Tuda urang mah geus biasa solo player, tara bagi-bagi referal atawa nawarkeun produk ka batur, sok ngerakeun, bisi batur teu minat.

Ngobrol soal crypto ge jeung si Ahonk doang, da ceuk batur mah pasti moal kaharti.

Ayeuna teh geus bulan Desember, akhir taun 2022. Kumaha kahirupan ngke taun hareup euy, piraku rek kos kieu wae, umur tereh nincak ka angka 40, huis beuki ngalobaan, pamajikan can boga. Mun dibayangkeun mah sok keu'eung, hirup sorangan wae nepi kolot, ampun Gusti. Aslina urang teh hayang kawin mah, minimal boga kabogoh atuh, tapi da kondisi ekonomi tidak memungkinkan, loba kasieun, teu wani nekad.

Najan kumaha ge hirup mah kudu terus dijalani, percuma ngeluh oge moal bisa ngarubah kaayaan. Bersyukur urang masih bisa ngudud jeung ngopi bari ngadengekeun radio, nikmat pisan pan eta teh.

Nu penting mah sehat rohani jeung jasmani, iman ka Alloh nu Maha Kawasa.

Geus ah sakitu heula weh, urang rek nempoan iklan deui, mulungan receh.